So, de Strampli isch die ganz Wuche im Buuch blibe. Inzwüsche simmer bi Wuche 39 ahglangt und so fescht wiemers gnüssed no "eifach churz für eus was entscheide" und ganz sponti was z'mache mit nume dra dänke müsse wases für eus zwei so brucht, gnau so fescht freuemer eus, uf wenn de chli Knirps entscheided zum zu eus id Arme z'cho. :) Grossi Sprüng hets nöd gäh die Wuche, zweimal surfe in Pacifica für de Fäbe und viel Telefon und liebi Nachrichte und pfuuse dezwüsche für d'Jasi :D S'Burlingame Festival isch am Wuchenend zweimal vo eus ahgstüret worde und es isch so cool zum gseh und z'wüsse, dass mer da so e cooli Gägend hend womer wohned, wo d'Lüüt so friedlich sind und alles so Spazier- und Family-fründlich! :)

E Wuche wo de Fäbe viel gschaffet hät. D'Jasi isch ih dere Ziit am Album gstalte und hofft, dass sie no fertig wird bevor de Chlii chunnt :) Mit de Mum Fründin Sarah vo da het sie de Ziistig verbracht, am Fritig isch denn ihres Chind cho :O Hui, ez wirds langsam real!

De Fäbe het sis neue Board (incl. Wetsuit) zweimal chönne usfüehere die Wuche :) s'Wätter in Pacifica isch lang nöd immer optimal und d'Wälle logischerwiis ä nöd... umso cooler hets gad zweimal klappt! D'Jasi gnüsst währenddem amel die chüehli Meeresluft und Podcasts uf de Ohre :) Am 2. August hämmer sit me guete Jahr wiedermal Zopf gässe; mit Zopfmehl usem Migros!! De Sevi isch so guet gsi und het eine bache und eus denn zum Brunch ihglade - so fein gsi! :D 

E Wuche mit viel Catch-up Calls, vo dem gits halt amel keis Foti, aber d'Jasi het die Wuche sicher 12h ih Calls verbracht^^ Für de Fäbe isches ä e sehr exciting week gsi, wills es neus Surfboard sowie en Wetsuit gäh het :D Am Fritig simmer in Redwood City go Schnitzel schnabuliere im Gourmethaus Stadt. Solid gsi, aber ganz eigentli hemmer es Cordon Bleu gsuecht... aber das gits da anschiinend nirgends :( Am Wuchenend hani de Fäbe chönne überrede, zum no es paar Föteli mache - sind priima usecho für Selbstuslöser, findi :)) 

Bsuech vo Mittwuch bis Sunntig - d'Rahel het en 5 Stunde Flug uf sich gnoh zum eus go bsueche! Soo schööön <3 Mer hend en Zweitagesusflug nach Monterey gmacht und d'Ziit zämme gnossä. So schnell verbii gsi!

Nöd so viel gloffe die Wuche :-) De Fäbe het am Nachber dunne ghulfe chrampfe, mer sind go schwümme, go laufe, an Market in Burlingame und immer zwüschetdure isch d'Jasi amel chli müed :D

Biz meh als e Wuche dasmal - mer hend eus en "Babymoon"-Roadtrip nach Bend gönnt! :D De Fäbe het en Feriätag gnoh und am Fritig isch de Nationalfiirtig (4th of July) gsi, so hämmer "gnueg" Ziit gha. Aso es het natürli scho ä en Tag meh dörfe sii im Nachhinein. In Bend isches mega friedlich gsi und es het viiel cooli Aktivitäte gha zum mache, wo leider weg de beschränkte Ziit nöd all is Programm passt hend :). 

Aber vo vorne; Am Dunnstignami simmer los! Natürli nöd die einzige gsi uf de Strass und drum öppe 1h länger gha als wenns kei Stau gha hetti. In Red Bluff isch di erst Übernachtig plant; d'Uswahl ah Restis ih so chline Dörfli isch immer biz beschränkt - es het mexikanisch gäh, e riiise Portion!
Fritig 4.7.; So e schöni Gägend! In California hets vorallem Frücht- und Gmüesahbau-Fälder gha, in Oregon hauptsächlich Bäum :D Im Dörfli 'Klamath Falls' hets en Kaffi-Stop gäh - usegfunde usem Dörfli hemmer fascht nüm weg de 4th of July-Parade. Next Stop: Crater Lake. De tüüfschti See ide USA! Wunderbar blau gsi und ä biz Schnee :-) 
De Fähler vom Tag hemmer in Bend gmacht; Öppis neus usprobiere hemmer denkt und sind is Dörfli gloffe ohni konkrete Plan was Znacht ässe, was völlig untypisch isch für eus. Mer sind beid nervöös (und vilicht bis hangry) worde nachem dritte Resti wo kei Platz gha het. Im Pine Tavern hends eus no es Plätzli gäh und de Burger isch uuh fein gsi! :) Füürwerch zum Dessert womer hend chönne vom Campfire bi eusem Hotel uus luege.

Samstig 5.7.; Ersti Halt isch bime Obsidian-Feld gsi. Det isch de Vulkan usbroche und d'Lava isch Teil wegem Druck wie verglast worde. S'Ergebnis isch en verglaste, pechschwarze Stei namens Obsidian. Nach dem chline Rundweg, hemmer no churz welle um de Paulina Lake umelaufe, en hübsche Bergsee miteme herzig gmachte Wägli grad am Wasser entlang. Nach zweidrüüviertelstund simmer so glücklich gsi, zum bim "Badi-Kiosk" ahzchoo und Fish und Chips chönne z'ässe :D Am Nami/Abig no euse biz grüsligi Hotelpool und Bend gnosse binere Brewery für de Fäbe und me Glace für d'Jasi.

Sunntig 6.7.; So warm!! Nachem Usflug zume schöne Wasserfall hend mer entdeckt, dassmer da chan böötlä - leider het eus d'Ziit nöd glangt, aber für nöchst mal :P Mir sind südwärts richtig Mt. Shasta; s'Dörfli "Weed" isch de Ort gsi womer pfuust hend :D Am 8i nomal en Usfluug zume Wasserfall, dasmal en chlinere womer ä het chönne is Wasser - d'Mugge hend eus abghalte zum lang verwiile. En McFlurry usem Drive Thru het eus de Abig versüesst :P. 

Mäntig 7.7.; S'Ziel isch dehei sii am Abig, 4.5h Fahrt sind vor eus gläge. Ghaltet hämmer bim Mt. Shasta für en stündige Spaziergang am Berg obe, für en feiiine Kaffi im Dörfli unde, für Zmittag irgendwo im Nirgendwo und für e Rundi Minigolf in Fairfield. Klar, dass de Fäbe gunne hät...