De Ostermäntig het de Fäbe für sich selber frei gnoh, eifach damit er wiedermal es langs Wuchenend het, und das isch e gueti Entscheidig gsi! :) Mir sind nachem Tennis am Morge uf Capitola abedüset, das isch es chlises Küste-Stedtli wo für farbigi Hüsli am Strand berüehmt isch. De Wind isch zimli biisig gsi, trotzdem hemmers gnosse und sind no es Stündli an Strand gläge, bevor mer über Santa Cruz zrugg sind.

Fürs Wuchenend isch schlächt Wätter ahgseit gsi - natürli ischs denn glich nöd soo schlächt gsi und d'Jasi het ihre Stubesunntig nöd chönne duresetzä (was vlt ä gsünder gsi isch). Im Target hemmer eus zum erstä mal id Baby-Abteilig getraut, aaaber nume zum LUEGÄ - kauft hemmer no nüüt :D (D'Jasi het jedoch uf Amazon schomal e Ihchaufsliste erstellt).
S'Fondue am Sunntig (us de Pfanne) isch easy gsi zum eus dra erinnere dasmers beid nur mittelguet vertäged, aber zu mild für eusi ah Schwiizer Chääs gwöhnte Gschmacksnervä, janu... :D Öppis meh womer eus no laaang druf freue chönd :P

D'Wuche vo Ostere isch da äne unspektakulär bezüglich Freitäg: existiered nämli nöd. Under de Wuche hend mer hend wiiter bitz d'Gägend uskundschaftet und sind am Mäntig und ä am Fritig ah neui Ort go spaziere :) Ä wenns kein Karfritig und Ostermäntig gschänkt git, hämmer es speziells Weekend drus gmacht ihdem dasmer in Norde (Wiiregion) gfahre sind, Sonoma uskundschaftet und e Nacht in Guerneville verbracht händ. Am Sunntig simmer ufd Winery MacRostie zum es Wii-Tasting go mache. Während de Mister sich dur 8 verschiedeni Wii dureprobiert, isch ä d'Jasi mit zwei verschiedene Iistees und me feeiiine Plättli beschäftigt worde - herrlich gsi! Mer hend chönne zueluege wie sich de Näbel am Mittag ufglöst het und d'Sunne glii scho richtig schön warm gäh hät.

Die Wuche het de Fabian viel Research gmacht rund um Autos und was für Ahgebot dases da umenand ih de Garage so hät. Ohni Auto ischmer nämli scho chli "stuck". Für die chliinste Sache isches praktisch zum da es Auto haa, aber vorallem für wenn mer biz wett umechoo, wett go wandere oder aber ä für zB eusi Wösch im Wäschsalon (wo nöd gad um de Egge isch) z'wäsche. Mir hend eus "Auto chaufe" für am Wuchenend ufgspart. Under de Wuche hend mer zämme es Mobile bastlät für euse chlii Buddy und mer henden wiedermal uf Ultraschall gseh! Die neu Klinik womer da gönd (Sutter Health San Carlos) isch suuuper, d'Ärztin het sich viel Ziit gnoh für Frage und mer hend eus wohl gfühlt. Es isch alles viel moderner als in Hawaii und mer hend es richtigs Booklet übercho uf was mer münd achte usw. 
S'Tennis am Fritigabig in San Mateo hät mit "45 min warte bis de Platz frei wird" (will mer nöd chan reserviere) ahgfange, chum gspielt, hämmer eus selber beid überrascht wie guet dases no gange isch nach dere eher längere Pause. :)
Wo am Samstig de Autochauf/-umelueg ahgstande isch, hend mer eus es paar mal ab eus selber gfrögt, wieso dass de gliich Fähler wie in Honolulu wieder muss gmacht wärde - wer gaht mit de ÖV go Autos ahluege? Ja ok, Mänsche wo keis Auto händ und eis bruuchet, aber eis Miete het eus scho Ziiit gspart^^ Jänu, so simmer halt nach 50 Min Bus fahre binere Garage ahcho mit komischem Verchäufer wo euse Favorit gad verchauft hät. Es Uber hät eus denn 66km nach Sunnyvale abegfahre wo mer no es paar anderi Autos gseh händ. Zwei vo drüü simmer Probe-gfahre - es isch schnell entschiede gsi; De VW Tiguan 2019 mit 4WD sölls si. No schnell "easy" 20k Cash bide Bank go abhebe, und denn s'Auto zahlt. Mit dem ischs aber nöd ganz gmacht, will mer bruched äno e Versicherig zum heifahre chönne mit dem Auto :D Also hemmer no öppe 1h lang s'Wifi vode VW Garage misbrucht, gsuecht und telefoniert und vergliche welle Ahbüter e gueti und zahlbari "Same Day Insurance" ahbütet. Am 6i simmer richtig hei und hend eus statt uswärts Znacht, Take Away Panda Express gönnt wo äno für de Zmittag morn langt... #sparsam haha 
De gschetzt täglichi Sunneschi hend mer am Sunntig gnosse ih dem mer mitem Auto neumeds anegfahre sind womer mit de ÖV nie cho wäred. Nach 2h wandere sind beid biz müed gsi und drum de Rest vom Sunntig mit Lasagne dehei usklinge lah :)

De Fäbe hets gschafft :) Am 1. April isch alles dure gsi und PDI isch ab sofort de neui Arbeitgeber. Mir sind beid so froh und erliechteret dass das dure isch! :)) Ah dem Abig simmer mitem neue elektrische Zug namens Caltrain (übrigens bout worde vo Stadler us de Schwiiz) no uf Palo Alto go ahstosse mit em Kolleg und sinere Frau. De Rest vode Wuche isch voll gsi mit Gägend erkunde, Lüüt träffe (Leo und Nina, Sevi und Claire) und Sache erledige (Theoretische Fahrprüefig für eus beidi zB).